ᐳᓚᕋᕝᕕᖓ > ᖃᐅᔨᓴᒐᕐᕗᑦ

ᖃᐅᔨᓴᒐᕐᕗᑦ

ᓇᐃᓕᒋᐊᖅᓯᒪᔪᖅ

ᑖᓐᓇ Puijila ᖃᐅᔨᓴᒐᕗᑦ ᓯᕗᓕᐅᕆᔭᐅᕗᖅ ᓇᑖᓕᐊ ᕋᐃᑉᔅᔩᓐᔅᑭ, ᐅᔭᕋᕈᖅᓯᒪᔪᓂᒃ ᖃᐅᔨᓴᖅᑎ ᐱᓕᕆᔪᖅ Canadian Museum of Nature. ᕋᐃᑉᔅᔩᓐᔅᑭ ᖃᐅᔨᓴᒐᖏᑦ ᓵᓐᖓᕗᑦ ᑕᒪᒃᑯᓄᖓ ᐅᑭᐅᖅᑕᖅᑐᒥᑦ ᒥᖅᑯᓖᑦ ᐱᕙᓪᓕᐊᓂᖏᓐᓂᒃ. ᖃᐅᔨᓴᖅᑕᖏᑦ ᐱᓪᓗᐊᑕᖃᖅᑐᑦ ᐊᑦᑐᐃᓂᕆᔭᖏᑕ ᓄᓇᐅᑉ ᐃᓕᖅᑯᓯᖓᑕ ᓯᓚᖓᑕᓗ ᐆᒪᔪᐃᑦ ᐊᔾᔨᒌᓐᖏᓐᓂᖏᓐᓄᑦ, ᑕᑯᓗᒍ ᐊᕐᕌᒍᒐᓴᐃᑦ. ᐃᓚᖏᑦ ᓇᓗᓇᐃᖅᐸᒻᒪᑕ ᐅᑭᐅᖅᑕᖅᑐᒥᑦ ᐅᔭᕋᕈᕐᓂᑯᑎᒍᑦ ᓇᓂᔭᐅᕙᓪᓕᐊᓂᖏᒍᑦ.

ᑕᐃᒪᓐᓇᐃᓐᓂᖓᓄᑦ, ᕋᐃᑉᔅᔩᓐᔅᑭ ᖃᐅᔨᓴᖅᑎᓂᒃ ᓯᕗᓕᐅᕆᓪᓗᓂ ᑲᓇᑕᐅᑉ ᖁᑦᑎᑦᑐᖓᓄᑦ ᐅᑭᐅᖅᑕᖅᑐᐊᓄᑦ. ᓴᖅᑭᓐᓇᓱᐊᒐᑦᑕ ᓯᕗᓕᐅᕆᔭᕗᑦ ᕿᓂᖅᓴᐃᓂᕐᒥᒃ ᐅᔭᕋᕈᖅᓯᒪᔪᓂᒃ ᓴᐅᓂᕕᓂᕐᓂᒃ ᒥᖅᑯᓕᓐᓂᑦ ᐆᒪᔪᕕᓃᑦ 24-20 ᒥᓕᔭᓐ ᐊᕐᕌᒍᐃᑦ (ᒪᐃᔪᓰᓐ ᐊᕐᕌᒍᖏᒍᑦ).

ᐱᓕᕆᐊᕗᑦ ᑲᔪᓯᑦᑎᐊᖅᓯᒪᕗᑦ ᐊᑑᑎᖃᖅᑐᒥᒃ. ᑲᒪᓇᓛᖑᔪᖅ ᓇᓂᓯᓂᕆᔭᕗᑦ ᐊᑯᓐᓂᖅᓱᖅᑐᖅ ᓂᕐᔪᑎ ᐊᓯᔾᔨᖅᐸᓪᓕᐊᓂᖏᑕ ᓯᖅᑯᓖᑦ (ᓇᑦᑏᑦ, ᓯᖅᑯᑯᑖᓖᑦ, ᐊᐃᕖᓪᓗ). ᑖᓐᓇ ᒪᐃᔪᓰᓐ ᐊᕐᕌᒍᖏᒍᑦ ᐃᒪᕐᒥᐅᑕᖅ, Puijila darwini, ᑕᑯᔅᓴᕈᐃᔪᖅ ᖃᓄᐃᓕᖓᓂᕕᓂᖓᓂᒃ ᐊᐱᖅᑯᑎᓂᓪᓗ ᓴᖅᑭᑎᕆᓪᓗᓂ ᖃᓄᖅ ᓯᖅᑯᓖᑦ ᐊᓯᔾᔨᖅᐸᓪᓕᐊᓐᓂᕐᒪᖔᖏᑕ ᐊᕐᕌᒍᒐᓴᐃᑦ ᐊᓂᒍᖅᖢᑎᒃ ᓄᓇᐃᓪᓗ ᐊᓯᔾᔨᖅᐸᓪᓕᐊᑎᓪᓗᒋᑦ.

ᕿᓂᖅᓴᕐᓂᕆᔭᕗᑦ

 

 

 

ᕋᐃᑉᔅᔩᓐᔅᑭ ᐊᒻᒪᓗ ᖃᐅᔨᓴᖅᑎᐅᖃᑎᖏ ᑕᓪᓗᕈᑎᐅᑉ ᕿᑭᖅᑕᖓᓄᑦ ᐊᐅᓪᓛᓚᐅᖅᑐᑦ, ᓄᓇᕘᒥᑦ, 2007-ᒥᑦ ᐊᒻᒪ 2008-ᒥᑦ. ᐅᓄᖅᑐᑦ ᑲᑐᔾᔨᖃᑕᐅᔪᑦ ᐱᔪᓐᓇᐅᑎᓂᒃ ᐱᑕᖃᖅᑎᑦᑎᔪᑦ ᐊᓯᖏᑦ ᑮᓇᐅᔭᑎᒍᑦ ᐱᔨᑦᑎᕋᕐᓂᒃᑯᓪᓗ ᐃᑲᔪᖅᑐᑦ ᕿᓂᖅᓴᕐᓂᕆᔭᑦᑎᓐᓄᑦ.

ᓄᓇᖓ ᕼᐊᐅᑕᓐ ᐊᐳᖅᑕᐅᓂᕕᓂᖓ, ᑕᒪᒃᑯᐊ ᓯᐅᖅᑲᖏᑦ ᓇᓗᓴᐃᖅᓯᕗᑦ ᑕᓯᖃᓚᐅᖅᓯᒪᓂᖓᓂᒃ ᑕᐃᔅᓱᒪᓂ ᒪᐃᔪᓰᓐ ᐊᕐᕌᒍᖏᒍᑦ. ᑕᓯᐅᑉ ᕿᒻᒪᑯᖏᑦ ᓇᓂᔭᐅᓯᒪᔪᑐᐊᖑᕗᑦ ᑕᐃᔅᓱᒪᓂ ᒪᐃᔪᓰᓐ ᐊᕐᕌᒍᖏᓂᒃ ᐅᑭᐅᖅᑕᖅᑐᒥᑦ ᐆᒪᔪᕕᓂᕐᓂᒃ ᐅᔭᕋᕈᐃᓪᓗᑎᒃ ᐱᕈᖅᑐᓂᒃ ᓂᕐᔪᑎᓂᓪᓗ, ᐃᓚᖃᖅᖢᑎᒃ ᕿᒥᕐᓗᓕᓐᓂᒃ.

ᐅᓇ ᓂᕈᐊᕈᑕᐅᒃᑲᓐᓂᕈᑕᐅᓚᐅᕐᒥᔪᖅ ᓄᓇᖓᓐᓂᒃ ᐱᓪᓗᒋᑦ ᐅᔭᕋᕈᕐᓂᑯᐃᑦ ᐱᐅᔪᒻᒪᕆᐅᓚᐅᕐᓂᖏᓐᓄᑦ ᓇᓂᔭᐅᔪᑦ ᑕᐅᕙᓂ (1979 – 1987). ᓇᓂᔭᐅᓚᐅᖅᑐᑦ ᐃᓚᖏᑦ ᐃᓗᐃᑦᑑᓪᓗᑎᒃ ᐃᓚᖏᑦ ᐃᓚᑰᒐᓛᒃᖢᑎᒃ ᓴᐅᓂᕕᓂᖏᑦ ᓇᓗᓇᐃᕆᕗᖅ ᑕᓯᖓ ᒪᓪᓕᒐᔪᓚᐅᓐᖏᓐᓂᖓᓂᒃ, ᑕᒪᓐᓇ ᓇᓗᓇᐃᖅᓯᒋᕗᖅ ᐅᔭᕋᕈᕐᓂᑯ ᐱᑕᖃᒃᑲᓐᓂᕐᓂᖓᓂᒃ. ᒪᓪᓕᒐᔪᒃᑯᓂ ᓴᐅᓂᕕᓂᖏᑦ ᓯᐊᒻᒪᒃᑲᔭᖅᑐᑦ. ᓴᓂᕌᒍᑦ ᑕᑯᓇᒃᖢᒋᑦ ᐊᓯᖏᑦ ᐅᔭᕋᕈᕐᓂᑯᓐ ᓯᖃᓕᓯᒪᒐᔪᒻᒪᑕ ᐃᑦᑕᕐᓂᓴᓕᕆᔨᓄᑦ ᓇᓂᔭᐅᒐᔪᑦᑐᐃᑦ, ᑕᒪᓐᓇ ᓇᓂᓯᓂᖅ ᐃᓗᐃᑦᑐᓂᒃ ᐅᔭᕋᕈᕐᓂᑯᓂᒃ ᐱᐅᒻᒪᑦ ᑕᒪᒃᑯᐊᓗ ᓯᖃᓕᖅᓯᒪᓐᖏᑦᑐᑦ ᐱᔪᒥᓇᓛᖑᓪᓗᑎᒃ. ᐃᓛᒃ, ᑖᔅᓱᒧᖓ Puijila, ᐅᓄᕐᓂᖅᓴᖅ ᐅᔭᕋᕈᕐᓂᑯᖓ ᓇᓂᔭᐅᓚᐅᖅᐳᖅ, ᐊᓯᖏᓪᓗ ᓴᐅᓂᕕᓃᑦ ᐅᔭᕋᕈᕐᓂᑯᐃᑦ.

ᐱᓕᕆᐊᖏᑕ ᐃᓚᒋᓪᓗᓂᐅᒃ, ᖃᐅᔨᓴᖅᑎᐅᔪᑦ ᐅᔭᖅᑲᓂᒃ ᖃᐅᔨᓴᒐᔅᓴᓂᒃ ᐊᕝᕗᓚᐅᕆᕗᑦ. ᐃᓚᖏᑦ ᐊᑐᖅᑕᐅᓂᐊᖅᑐᑦ ᐃᑦᑕᕐᓂᓴᐅᓂᖓᑕ ᐊᐳᖅᑕᐅᓂᕕᓂᖓᑕ ᖃᐅᔨᓴᖅᑕᐅᓂᖓᓄᑦ. ᐃᓚᖏᑦ ᐊᑐᖅᑕᐅᓂᐊᕐᒥᔪᑦ ᑐᑭᓯᓇᓱᐊᕐᓗᑎᒃ ᓯᓚᕕᓂᖓᓐᓂᒃ ᑕᐃᔅᓱᒪᓂ ᑕᓯᖃᖅᑎᓪᓗᒍ. ᓯᕗᓪᓕᖅᐹᒥᒃ ᕿᔪᕕᓂᕐᒥᒃ ᓇᓂᓯᓚᐅᖅᑐᒍᑦ ᐃᓗᐊᒍᑦ ᐊᐳᖅᑕᐅᓂᕕᓂᖓᑕ.

ᑭᖑᓪᓕᖅ >