ᐊᑯᓐᓂᖅᓱᖅᑐᖅ ᑲᑎᓐᖓᖃᑎᒌᓄᑦ

ᐅᔭᕋᕈᕐᓂᑯ ᒥᖅᑯᓕᒃ Puijila darwini ᐊᑯᓐᓂᖅᓱᖅᑐᖅ ᑲᑎᓐᖓᖃᑎᒌᓄᑦ "ᐊᑯᓐᓂᖅᓱᖅᑐᖅ ᑲᑎᓐᖓᖃᑎᒌᓄᑦ" ᒥᖅᑯᓕᒃ ᓄᓇᒥᐅᑕᖅ ᐊᓯᔾᔨᖅᐸᓪᓕᐊᑎᓪᓗᒍ ᑕᐃᔅᓱᒪᓂ ᑕᕆᐅᕐᒥᐅᑕᒧᑦ ᐅᓪᓗᒥᑐᑦ, ᑕᕆᐅᕐᒥᐅᑕᑐᑦ--ᐱᓗᐊᖅᖢᒋᑦ ᓇᑦᑏᑦ ᐃᓚᒋᔭᖏᓪᓗ ᓯᖅᑯᓖᑦ.

ᑕᑯᔅᓴᕈᖅᓯᒪᔪᑦ ᕿᒥᕐᕈᔭᐅᕙᓪᓕᐊᓪᓗᓂ ᓴᐅᓂᕕᓂᖏᓂᒃ ᑖᔅᓱᒪ ᓂᕐᔪᑎᕕᓂᐅᑉ ᓯᕗᓪᓕᖅᐹᖑᖃᑕᐅᔪᖅ, ᕿᑎᐊᓃᐸᓗᑦᑐᖅ ᓂᕐᔪᑎ ᐊᒡᒍᖅᑎᓪᓗᒋᑦ ᓯᖅᑯᓖᑦ ᐱᕙᓪᓕᐊᑎᓪᓗᒋᓪᓗ ᐃᒪᕐᒥᑦ ᑕᕆᐅᕐᒧᑦ: Puijila ᑕᒪᐃᓐᓂᒃ ᓄᓇᒦᓲᒥᒃ ᐊᒻᒪ ᐃᒪᓃᓲᒥᓪᓗ ᐃᓕᖅᑯᓯᓕᒃ ᓴᐅᓂᕕᓂᖏᑎᒍᑦ.

ᑖᓐᓇ Puijila darwini ᐅᔭᕋᕈᕐᓂᑯ.

ᑕᑯᓪᓗᒍ ᓯᕗᓪᓕᖅᐹᒥᒃ, Puijila ᐃᓯᒐᐅᑎᖏᑦ, ᓂᐅᖏᑦ ᐸᒥᐅᖓᓗ ᐊᔾᔨᖃᖅᑰᔨᓐᖏᓚᑦ ᓯᖅᑯᖏᓐᓂᒃ ᖃᑦᑎᒐᓛᓐᖏᑦᑐᓪᓗ ᑎᒥᖃᕐᓂᖏᑕ ᓯᖅᑯᓖᑦ ᐅᓪᓗᒥ. ᕿᒥᕐᕈᑦᑎᐊᖅᖢᒍ ᐅᔭᕋᕈᕐᓂᑯ ᓇᓗᓇᐃᕆᑲᐅᑎᒋᒻᒪᑦ ᐃᒪᕐᒦᑉᐸᓐᓂᖓᓐᓂᒃ. ᐋᖅᑭᔅᓯᒪᓂᖏᑦ ᑖᔅᓱᒪ Puijila ᓯᕗᓪᓖᖏᑦ ᑕᔭᕐᓂᖏᓪᓗ ᓄᑭᖃᕐᓂᐅᓪᓗᑎᒃ, ᓲᕐᓗ ᓂᕐᔪᑎ ᐃᒫᒎᓕᓂᐅᓪᓗᓂ ᐅᕝᕙᓗ ᐊᒡᒐᑦᑎᐅᓪᓗᓂ. ᑭᓯᐊᓂ, ᑯᑭᖏᑦ ᑕᑯᔅᓴᕈᐃᕗᑦ ᐊᒡᒐᑦᑎᐅᓚᐅᓐᖏᓐᓂᖓᓐᓂᒃ ᓇᐃᓗᐊᒧᑦ. ᐊᖅᑲᐅᒪᓕᓂᐅᔪᓇᖅᖢᓂ, ᐱᓪᓗᒍ, ᑖᒃᑯᐊ ᓴᐅᓂᒐᓚᖏᑦ ᓯᖅᑰᔭᖏᓐᓂᒃ ᑕᑭᔫᒻᒪᑕ, ᑐᐊᑦᑑᓪᓗᑎᓪᓗ ᐊᔾᔨᖃᖅᖢᑎᒃ ᐅᓪᓗᒥ ᐊᑯᓐᓂᖃᖅᑐᓄᑦ ᕿᓯᒻᒥᑦ ᓲᕐᓗ ᑕᓕᕈᐊᕐᒥᑦ ᐅᕝᕙᓗ ᓯᖅᑯᒥᒃ ᑕᑯᔅᓴᐅᑎᑕᑦ ᓇᑦᑎᕐᓄᑦ. ᑕᒪᒃᑯᐊ ᐊᓯᖏᓪᓗ ᑎᒥᕕᓂᐊᑕ ᐃᓕᖅᑯᓯᕆᔭᖏᑦ ᓇᓗᓇᐃᕆᕗᑦ ᐃᒪᕐᒥᐅᑕᐅᕙᓐᓂᖓᓂᒃ ᐃᓚᖓᒍᑦ ᐃᓕᖅᑯᓯᕆᔭᒥᒍᑦ ᑖᓐᓇ Puijila.

ᐊᓯᔾᔨᕆᐊᕐᓂᖏᑦ ᓯᖅᑯᓄᑦ

ᐱᓗᐊᕈᑎᒋᒃᑲᓐᓂᖅᖢᒍ, ᑖᒃᑯᐊᓗ ᐊᔾᔨᖃᕐᓂᕆᔭᕋᓗᐊᖏᑦ ᐸᒥᐅᑯᑖᓖᑦ ᑰᒻᒥᐅᑕ, Puijila ᓇᓗᓇᐃᖅᑕᐅᓚᐅᖅᐳᖅ ᓂᕐᔪᑎ ᓯᕗᓕᐅᕆᓂᑯᑦ ᐅᓪᓗᒥ ᓯᖅᑯᖃᖅᑐᓄᑦ (ᓇᑦᑏᑦ, ᓯᖅᑯᑯᑖᓖᑦ ᐊᒻᒪ ᐊᐃᕖᑦ). ᖃᕆᓴᐅᔭᒃᑯᑦ ᐃᓗᐃᑦᑐᕈᖅᑎᑕᐅᓂᑯᑦ ᓴᓇᔭᑦ ᓂᐊᖁᕕᓂᐊᓂᒃ ᓇᓕᓇᐃᕆᓚᐅᕐᒪᑕ ᖄᒃᑲᓐᓂᐊᒍᑦ ᓇᑦᑎᐅᑉ ᐃᓕᖅᑯᓯᖏᓐᓂᒃ.

ᑖᒃᑯᐊ ᓄᑖᖑᓛᒥᒃ ᑕᑯᓐᓇᕈᑎᔅᓴᒥᒃ ᐃᓗᓕᖃᕆᐊᖃᖅᑐᑦ ᖃᕆᓴᐅᔭᑎᑦ ᑕᑯᔪᒪᒍᕕᒋᑦ ᐊᔾᔨᓐᖑᐊᑦ. ᑖᓐᓇ ᐱᔪᓐᓇᖅᑕᐃᑦ ᐅᑯᓇᓐᖓᑦ ᐊᑕᐅᐱ ᖃᕆᓴᐅᔭᓕᕆᕝᕕᖓᒍᑦ.

ᐱᒋᐊᕐᓂᖓ-ᓄᓇᒥᒃ-ᑕᕆᐅᕐᒧᑦ ᐊᓯᔾᔨᓯᒋᐊᕐᓂᖓ ᓯᖅᑯᓕᓐᓄᑦ ᑐᑭᓯᐊᒪᔭᐅᑦᑎᐊᓚᐅᓐᖏᒻᒪᑦ. ᖃᐅᔨᓴᖅᑏᑦ ᐊᑯᓂᒻᒪᕆᒃ ᐳᐃᔨᓂᒃ ᓯᕗᓕᖃᕐᓂᖏᓐᓂᒃ ᑐᑭᓯᐊᒪᔪᑦ ᓄᓇᒥᐅᑕᕕᓂᕐᓂᒃ. ᐅᔾᔨᕆᓪᓗᒋᑦ ᓇᑦᑏᑦ ᐊᒻᒪ ᓯᖅᑯᑯᑖᓖᑦ ᐃᓚᕈᔪᖏᑦ (ᓯᖅᑯᑯᑖᓖᑦ ᐊᐃᕖᓪᓗ) ᐊᔾᔨᒌᓐᖏᓐᓂᖃᐅᕐᓂᖏᓐᓂᒃ, ᖃᐅᔨᓴᖅᑏᑦ ᑕᐅᑐᓐᖑᐊᒐᖃᖅᖢᑎ ᐊᔾᔨᒌᓐᖏᑦᑐᓂᒃ ᓯᕗᓕᖃᓚᐅᕐᓂᖏᓐᓂᒃ ᓄᓇᒥᐅᑕᕕᓂᐅᔪᓂᒃ ᑕᐃᔅᓱᒪᓂᑐᖄᓗᒃ. ᐃᓱᒪᒋᔭᐅᓂᑯ ᒪᓕᒃᖢᒍ, ᑖᓐᓇ ᐱᒋᐊᕐᓂᖓ-ᓄᓇᒥᒃ-ᑕᕆᐅᕐᒧᑦ ᒪᕐᕈᐃᖅᓱᕋᔭᕆᐊᖃᓚᐅᕐᒪᑦ ᑕᕆᐅᕐᒧᑦ ᓅᓕᖅᑎᓪᓗᒋᑦ ᓯᖅᑯᓖᑦ.

ᖃᖓᑦᑎᐊᖅ ᑎᒥᖓᑕ ᐊᒻᒪᑦᑕᐅᖅ ᐃᔨᒧᑦ ᑕᑯᔅᓴᐅᖏᑦᑐᓄᑦ ᕿᒥᕐᕈᐃᓃᑦ ᓴᖅᑮᔭᖃᖅᓯᒪᓕᕐᒪᑕ ᐊᑕᐅᓯᕐᒥᒃ ᓯᕗᓕᖓᓂᒃ ᓯᖅᑯᓖᑦ. ᑖᓐᓇ Puijila ᐆᒪᓚᐅᖅᓯᒪᒻᒪᑦ ᐊᑕᐅᑎᒃᑯ ᓯᖅᑯᓕᓐᓂᒃ ᐅᔭᕋᕈᒃᓂᑯᓂᒃ, ᖁᓛᓃᖅᑰᔨᓐᖏᓚᖅ ᐅᓪᓗᒥ ᓯᖅᑯᓕᓐᓄᑦ. ᑭᓯᐊᓂᓕ, ᓇᓗᓇᐃᕆᖅᑰᔨᕗᖅ ᓯᕗᓕᖃᖅᑐᐃᓐᓇᐅᓂᖏᓂᒃ Puijila- ᐊᔾᔨᖓᓐᓂᒃ ᖁᓪᓕᐅᕌᕐᔪᑦᑐᒥᒃ ᓴᖅᑮᔪᕕᓂᕐᒥᒃ ᑕᒪᐃᓐᓂᒃ Puijila ᐊᒻᒪᑦᑕᐅᖅ ᑕᓕᕈᓕᓐᓄᑦ ᓯᖅᑯᓕᓐᓄᑦ.

ᑭᖑᓪᓕᖅ >