ᐅᔭᕋᕈᕐᓂᑯ
ᓇᓂᔭᐅᓂᑰᔪᖅ
ᐅᔭᕋᕈᕐᓂᑯ ᓴᐅᓂᕕᓂᖏᑦ ᑖᔅᓱᒪ ᓄᑖᖑᔫᑉ ᓂᕿᑐᖅᑎᐅᑉ ᓂᕐᔪᑎᖓ Puijila darwini ᐊᒡᒐᑦᑕᐅᓚᐅᖅᑐᖅ 24 ᒥᓕᔭᓐ 20 ᒥᓕᔭᓐ ᐊᕐᕌᒍᑦ ᐊᓂᒍᖅᑐᓄᑦ ᕿᒪᑦᑕᐅᓂᑯᑎᒍᑦ ᓄᓇᒃᑯᑦ ᑲᓇᑕᐅᑉ ᖁᑦᑎᑦᑐᖓᑕ ᐅᑭᐅᖅᑕᖅᑐᖓᓂᒃ. ᑖᓐᓇ ᓄᓇᖓ ᐃᓗᐊᓃᑦᑐᖅ ᕼᐊᑕᓐ ᐊᐳᖅᑕᐅᓂᕕᓂᖓ — ᕿᓚᒻᒥᑦ-ᑐᓗᖅᑕᐅᓂᑯ - ᑕᓪᓗᕈᑎᐅᑉ ᕿᑭᖅᑕᖓᓂᑦ, ᓄᓇᕘᒥᑦ.
ᐱᒋᐊᕈᑕᐅᔾᔪᑎᒋᔭᖓ ᑕᑯᔅᓴᖅ Puijila darwini. ᐊᕝᕗᖅᑕᐅᓂᑰᑉ ᓈᓴᐅᑎᖓ: NUFV405
ᓂᕐᔪᑎᕕᓂᐅᑉ ᓴᐅᓂᖏᑦ ᓇᓂᔭᐅᓚᐅᖅᑐᑦ 2007-ᒥᑦ, ᐊᒻᒪᓗ ᑖᒃᑯᐊ ᐃᑦᑕᕐᓂᓴᓕᕆᔩᑦ ᐅᑎᓚᐅᕆᓪᓗᑎᒃ 2008-ᒥᑦ ᕿᓂᖅᓴᕆᐊᖅᖢᑎᒃ (ᐅᖃᓕᒫᕈᒃ ᐅᓂᒃᑳᖓ ᐱᓚᕿᓂᕗᑦ ᐊᑐᖅᓯᒪᔭᕗᓪᓗ ᑕᐅᕙᓂ).
80%-ᖓ ᓴᐅᓂᕕᓂᖏᑕ ᓇᓂᔭᐅᓚᐅᖅᑐᑦ ᐊᕝᕗᖅᑕᐅᓪᓗᑎᓪᓗ, ᐃᓚᒋᓪᖢᒋᑦ ᓂᐊᖁᕕᓂᖓ, ᖁᖓᓯᖓ, ᐸᒥᐊᖓ ᐊᒻᒪ ᓯᕗᓪᓖᖏᑦ ᑭᖑᓪᓖᖏᑕᓗ ᓴᐅᓂᖏᑦ. ᓴᐅᓂᕋᓛᑦ ᓲᕐᓗ ᒥᑭᓕᕋᖏᑦ ᑯᑭᖏᓪᓗ ᓇᓂᔭᐅᓚᐅᕆᓪᓗᑎᒃ.
ᑕᑯᓇᒃᖢᒋᑦ ᑭᒍᑎᕕᓂᖏᑦ ᓴᐅᓂᕕᓂᖏᓪᓗ ᑕᑯᓪᓗᒋᑦ, ᑖᓐᓇ ᓂᕐᔪᑎ ᖃᓄᐃᖏᑦᑎᐊᖅᑐᕕᓂᖅ ᖃᓂᒻᒪᓯᖃᕐᓂᑰᖅᑰᔨᓇᓂ. ᐊᑕᐅᓯᑐᐊᕐᒥᒃ ᐃᓕᖅᑯᓯᖅᓱᓐᖏᑦᑐᒥᒃ ᐅᔾᔨᕆᔭᖃᓚᐅᖅᑐᒍᑦ ᐅᔭᕋᕈᕐᓂᑯᓂᒃ ᐃᓚᖓ ᓴᐅᒥᖓᑕ ᑭᖑᓪᓖᖓᑕ ᐃᓯᒐᔮᖏᑦ ᓇᑲᑦᑐᕕᓂᐅᓂᑰᓪᓗᓂ ᒪᒥᓐᓂᑯ. ᑖᓐᓇ ᐳᑐᒍᕐᓚᐅᔭᖓ ᓇᑲᓐᓂᑯ ᓴᐅᓐᓂᒃᑲᓐᓂᕐᓂᑰᓪᓗᓂ ᓴᖅᑭᖦᖢᒍ ᓱᕋᓐᓂᕕᓂᖓ ᓯᕗᓂᐊᒍᑦ ᐱᔪᓐᓃᕐᓂᑰᓪᓗᓂ ᑕᐃᑯᖓ ᑐᖁᓂᕕᓂᐊᓄᑦ.
ᐊᑑᑎᓕᒻᒪᕆᒃ ᐅᔭᕋᕈᕐᓂᑯ
ᐅᔭᕋᕈᕐᓂᑯ ᖃᐅᔨᓴᖅᑎᓄᑦ ᐊᑑᑎᖃᓪᓚᕆᑉᐳᖅ ᑐᓐᖓᕕᔅᓴᐅᓕᕐᒪᑦ ᐅᖃᐅᓯᖃᑦᑎᐊᕆᐊᒥᒃ ᓄᑖᓂᒃ ᓯᕗᓕᕕᓂᐅᔪᓂᒃ ᓂᕐᔪᑎᓂᒃ ᑕᐃᒍᖅᑕ Puijila darwini. ᑕᐃᒪᓐᓇᐃᓐᓂᖓᓄ, ᓴᐅᓂᕕᓂᖏᑦ ᐅᖃᐅᓯᕗᑦ ᐱᒋᐊᕈᑕᐅᔾᔪᑎᒋᔭᖓ. ᑖᓐᓇᑕᕝᕙ ᓂᕐᔪᑎ ᐊᓯᖏᑦ ᓇᓂᔭᐅᔪᑦ ᐊᔾᔨᕕᓂᖏᑦ ᓇᓗᓇᐃᖅᑕᐅᓇᓱᐊᓕᖅᑎᓪᓗᒋᑦ ᐃᓚᖃᕐᓂᖏᓂᒃ Puijila ᑐᓐᖓᕕᒋᔭᐅᓂᐊᖅᖢᑎᒃ.
ᐅᔭᕋᕈᕐᓂᑯ ᑖᓐᓇ ᐊᑑᑎᖃᓪᓚᕆᑦᑐᒥᒃ ᓴᖅᑮᓯᒪᕗᖅ ᑐᑭᓯᐅᒪᓂᑦᑕ ᐃᓗᓕᕆᔭᖏᓐᓄᑦ ᖃᓄᖅ ᑕᒪᒃᑯᐊ ᓯᖅᑯᓖᑦ (ᓇᑦᑎᓪᓚᕆᑦ, ᓯᖅᑯᑯᑖᓕᑦ ᐊᐃᕕᓪᓗ) ᐱᕙᓪᓕᐊᓂᖃᕐᓂᕐᒪᖔᖏᑕ ᓄᓇᒥᐅᑕᒥᒃ ᐃᒪᖅᓱᕐᒥᐅᑕᒧᑦ ᐊᓱᐃᓛᒃ ᑕᕆᐅᕐᒥᐅᑕᕈᕐᓂᖏᑕ. Puijila ᐃᓕᖅᑯᓯᖓ ᐊᑯᓐᓂᖅᓱᖅᑐᖅ ᓂᕐᔪᑎ ᑕᕆᐅᖑᖏᑦᑐᒥᒃ, ᐃᒪᕐᒥᐅᑕᒥᒃ ᐃᓕᖅᑯᓯᖃᓕᖅᑎᓪᓗᒍ. ᖃᐅᔨᓴᖅᑕᐅᓂᐊᖅᑐᑦ ᑕᒪᒃᑯᐊ ᓇᒧᓪᓚᕆᒃ ᑖᓐᓇ Puijila ᐃᓂᖃᕐᒪᖔᑦ ᓯᖅᑯᓖᑦ ᐃᓚᒌᖁᑎᒋᔭᖏᓐᓂᒃ. ᐃᓱᒪᓇᖅᑐᖅ Puijila-ᖑᖅᑰᔨᔪᖅ ᓯᕗᓕᕕᓂᖓ ᑕᒪᐃᓐᓂᒃ ᓴᖅᑮᔪᕕᓂᖅ Puijila ᐊᒻᒪᓗ ᑕᓕᕈᓖᑦ ᓯᖅᑯᓕᖏᑕ.
ᑎᒡᒐᕕᓂᐅᕗᖅ!
ᐅᔭᕋᕈᕐᓂᑯ ᓴᐅᓂᕕᓂᖏᑦ ᐃᓚᖃᓚᐅᖅᐳᑦ ᐃᓗᐃᑦᑐᒥᒃ ᐅᓱᐋᒥᒃ (ᓴᐅᓂᖅ ᐅᓱᐊᖓᒍᑦ), ᖃᐅᔨᓚᐅᖅᐳᒍ ᓂᕐᔪᑎᕕᓂᖅ ᐊᖑᑎᕕᓂᖅ. ᑕᒪᒃᑯᐊ ᐅᓱᐋᑦ ᐃᓕᖅᑯᓯᕆᔭᐅᒻᒪᑕ ᓂᕿᑐᖅᐸᑦᑐᓄᑦ ᐊᓯᖏᓄᓪᓗ ᒥᖅᑯᓕᓐᓄᑦ, ᑭᓯᐊᓂᓕ ᐃᓄᐃᑦ ᐱᖃᓐᖏᑦᑐᑦ.
